ஓம் அகத்தீசாய நம!
பாரதம் மட்டும் இன்றி உலகம் முழுவதும் வெவ்வேறு இடங்களில் கோலாகலமாக கொண்டாட படும் பண்டிகை தான் நவராத்திரி. ஒவ்வொரு வருடமும் வருகின்ற இவ் ஒன்பது (9) நாட்களும் என் வாழ்வில் மிக முக்கியமான நாட்களாக நான் கருதுகிறேன். சென்ற வருடம் 2021ஆம் ஆண்டில் மிக சிறப்பாகவும், பயபக்தியுடனும் இவ் ஒன்பது நாட்கள் லலிதா தேவியை வணங்கி அவருடைய ஆசிகளை பெற்றடைந்தேன். அம்மன் வழிப்பாட்டில் மிக முக்கியமாக கருதப்படும் 'லலிதா சஹஸ்ரநாமத்தை" 9 நாட்களில் 108 முறை பாராயணம் செய்து முடித்தேன். இவ்வருடம் சிறிது முன்னேற்றம் அடைந்து, 'லலிதா ஸஹஸ்ரநாமம்' ஹோமத்தை மன நிறைவுடன் செய்தேன்! லலிதா சஹஸ்ரநாமத்தை ஓதுவதே சிறிது கடினம் என்று கூறுவர். இதில் ஹோமம் என்றால், நம் முழு பிராணத்தையும் அதில் செலுத்த வேண்டும். ஏனெனில், "சிதக்னிகுண்ட ஸம்பூதா தேவ கார்ய ஸமுத்யதா" என்று சஹஸ்ரநாமத்தில் 2ண்டாவது வரி கூறுகிறது. இதற்கு "தேவர்களுக்கு உதவி செய்ய அக்னி குண்டத்தில் இருந்து எழுந்தவளே!" என்று பொருளாகும். அக்னி குண்டத்தில் இருந்து உதித்தவளுக்கு ஹோமம் வளர்த்தால் அது எவ்வளவு பெரிய பாக்கியம்!
இவ்வளவு சக்தி வாய்ந்த ஹோமத்தை, ஓர் சாதாரண மனிதன் செய்யவது கடினம். ஒன்று வேதங்கள் கற்றிருக்க வேண்டும், இல்லை என்றால் யாரவது இவ் ஹோமம் செய்வதை பார்த்திருக்க வேண்டும். மேற்சொன்ன இரண்டுமே இல்லாமல், வெறும் அகத்திய மாமுனிவர் மற்றும் லலிதா தேவியின் ஆசிகளுடன் லலிதா பஞ்சமி (நவராத்திரி 5ஆம் நாள்) அன்று இவ் ஹோமத்தை அதி சிறப்பாக செய்து முடித்தேன்.
